റൂബിക് ക്യൂബ്
വല്ലാത്തൊരു സാധനംതന്നെ!
തിരിച്ച് തിരിച്ച് ചിരിച്ച് ചിരിച്ച് ചാവും നമ്മള്‍.
(ഇതുണ്ടാക്കിയ റൂബിക്കിനെ കയ്യില്‍ കിട്ടിയാലുണ്ടല്ലോ….
ഇഞ്ച ചതയ്ക്കുംപോലെ… ചതയ്ക്കും ഞാന്‍!)

വീട്
ഒരു റൂബിക് ക്യൂബാണ്.

ഭാര്യ നിറം
അമ്മ നിറം
മക്കള്‍ നിറം
അച്ഛന്‍ നിറം
സഹോദര,സഹോദരീ നിറം
സ്വന്തം ഇഷ്ടനിറം.

ഇരുന്ന്,
തിരിച്ച് തിരിച്ച്…

ഒന്നും
ഒരിക്കലും
തുടങ്ങിയതുപോലാകില്ല.

ഒന്നും
ഒരിക്കലും
ഒരുപോലെയുമാവില്ല.

അനിഷ്ടങ്ങളെ തിരിച്ചുമാറ്റി
ഇഷ്ടങ്ങളെ തിരഞ്ഞുതിരിച്ച്,
തിരിച്ചുതിരിച്ച്
ചിരിച്ചുചിരിച്ച് ചാവും നമ്മള്‍.

ഈ വീടു കണ്ടുപിടിച്ചവനെ
കയ്യില്‍ കിട്ടിയാലുണ്ടല്ലോ…!