കുഞ്ഞുനാള്‍ മുതല്‍
എവിടെ കുടം കണ്ടാലും
ഒന്ന് ഏന്തി നോക്കും
മൂടിക്കെട്ടിയതാണോ…!?
ഇതേ കൗതുകത്തില്‍
മുത്തശ്ശി മൂടിക്കെട്ടിയ
കടുമാങ്ങാഭരണി
തുറന്നിട്ടുണ്ട്; പലവട്ടം.
അമ്മ ഉപ്പിട്ടുവെച്ച
വാളന്‍പുളിക്കുടവും പലവട്ടം
ഇരുട്ടുമുറിയില്‍ വാപൊളിച്ചു
പുറത്തുവരുന്ന പുകച്ചുരുളുകള്‍ കാണാന്‍,
ചുരുളുകള്‍ക്കിടയിലെ ഭൂതത്തെക്കാണാന്‍.
മാങ്ങ പൂപ്പുകയറിയതും
പുളിങ്ങ വെളളമൊലിച്ചതും
അമ്മായിഭൂതം ചീത്തവിളിച്ചതും മിച്ചം.
ആ ഈസോപ്പും സുമംഗലയും
സിപ്പിയും മാലിയും കുഞ്ഞുണ്ണിയും
വിക്രമാദിത്യനും മുത്തശ്ശിയും കൂടി
നാട്ടിലെ കൊള്ളാവുന്ന പിള്ളേരെയെല്ലാം
വഴി തെറ്റിച്ചു.
ഏ പ്ലസ് ബി ഹോള്‍സ്‌ക്വയര്‍ പഠിപ്പിച്ച്,
ഷെയര്‍ മാര്‍ക്കറ്റിലെ കാളകളിപ്പിച്ച്,
മണിചെയിനിലെ
പെര്‍മ്യൂട്ടേഷന്‍ കോമ്പിനേഷന്‍ രസിപ്പിച്ച്,
ലൈഫ് പ്രാക്ടിക്കലാക്കുന്നതിന് പകരം
കുടംതപ്പികളാക്കി,
കവികളാക്കി,
കുഞ്ഞുങ്ങളെ സ്വപ്നം കാണിപ്പിച്ച്
വഴി പിഴപ്പിച്ചവര്‍.
കഷ്ടം!
